Nagbitla da PNP SAF commandos SPO1 Allan Lampitoc Franco ken PO2 Jovalyn Lozado, agpada a taga Ilocos Norte ken survivors iti nadara a ranget idiay Mamasapano, Maguindanao idi Enero 25.
Nabagas dagiti balikasda iti sango dagiti opisiales ti gobierno ken estudiantes a dimmar-ay ti Heroes Walk ditoy Laoag City idi Martes, Marso 10.
Naisentro ti anag ti bitlada iti kinatured ni Ilocano nangruna iti tay-ak ti dangadang kontra kadagiti kabusor ti estado.
Da Franco ken Lozano ti kameng ti 84th elite seaborne assault team a nangparmek kenni terorista Marwan. Segun ken ni Franco, nabirngasan ni Lozano a “point man” ti PNP SAF gapu ti kinatured. Isu ti adda idiay front line ti SAF a nangbegbeg ken ni Marwan idiay uneg ti kubo-kubona aginggat nauloyan ti anges.
Kada narisgo a mission, ni Lozano ti pasango gapu ti kinatured ken kinaparagsit. Natenneb ti bangina no kinnalay-atan ti banbantay, panagdalliasat ti waig ken karayan gapu ta nagubing ken dimmakel idiay montaniosa ti ilina nga Adams, Ilocos Norte. Ti pagsasa-ona: “Kung daanan ng bayawak, puede rin daanan ng tao.” Kasta met iti biang ni Franco. Nasukog met ti kinata-ona iti adu a rigat iti taltalon bayat ti panagbarona idiay ilina a Banna. Maragsakan la unay dagiti padada a taga SAF no maammuanda nga adda baro a sumrek a kamengda nga Ilocano. Simbolo ngamin ni Ilocano ti kinatured.
Inyebkas met ni Chief Supt. Moro Virgilio Lazo, kabarbaro a PNP SAF commander a taga-Laoag City, ti panang apresiarna ti provincial government of Ilocos Norte nga indauluan ni Gob. Imee Marcos gapu ti pammadayaw ken tulong pinansial a naipaay kada SPOI Franco ken PO2 Lozano, kasta pay ti scholarship para ti education dagiti kabagianda.#
