Addan CT Scan iti MMMH&MC

editoryal

Date published: February 20-26, 2017 issue

Napintas ti damag nga addan ti ramit a maaw-awagan ti CT Scan dita Mariano Marcos Memorial Hospital & Medical Center, Batac City, Ilocos Norte. Mausar ti CT (Computerized Topography) Scan a mangsukimat no adda perdi ti utek iti maysa a pasiente a naatake ti stroke, naibanggol ti ulo na gapu ti aksidente ken dadduma pay a mainaig a sakit iti utek.

Ni mismo nga Health Assistant Secretary Eric Tayag ti immay ditoy probinsya ket pormal a linukatan ti nasao nga apparatus a maaramat dagiti amin a pasiente. Inaguraran pay ni apo Tayag ti kabarbaro a Newborn Screening Laboratory a mangsukimat no adda depekto wenno nakana a sakit ti maysa a maladaga apaman a maiyanak dita nasao nga ospital.

Adu’t naragsakan idi ibalikas ni apo Tayag ken sinarurungan met ni MMMH OIC chief II Dr. Jose Orosa a dagiti nakukurapay a pasiente nga addaan ti PhilHealth a maiserrek ti nasao nga ospital ti kangrunaan a benepisaryo, ngamin idiaya kadakuada ti libre a serbisio iti CT Scan kas paset ti pro-Poor program ti Department of Health ken suportado met ti MMMH&MC.  

Naunday a panawen nga inar-arapaap ti kaadduan a maaddaan koma daytoy nga ospital pampubliko ti kastoy a moderno a ramit a CT Scan. Ngamin, nangina ti bayad ti agpa-CT Scan a singsingeren dagiti pribado a medical clinic a mapattapatta nga imabot ti P15,000 kada pasiente. Dakkel ngarud a tulong kadagiti kakailian tayo a marigrigat no libre kadakuada ti nasao a serbisyo ti CT scan.

Kasta ti akem iti gobiernotayo. Agkolektada kadatayo ti buis kas koma ti amilyar ti dagdaga, sansanikua, negosio ken dadduma pay pagbuisan. Kas bales, isublina kadatayo nga umili dagiti pinagbuis tayo babaen ti serbisyo medical, proyektos inprastraktura kas kalkalsada, rangtay, eskuela, irrigation dam ken dadduma pay a pagsayaatan ti pagilian.#