CPR

(ILUKO VERSION)

Date Published: November 20-26, 2017

Puntirya ti Philippine Heart Association a pagbalinen a CPR-ready ti pagiliantayo a Pilipinas inton madanon ti tawen 2021. Nabayagen ti PHA a nabuangay a gunglo ngem ita laeng nga adda kastoy a naisangsangayan a programana.

Ania ngamin ti CPR (Cardiopulmonary Resuscitation) mainaig ti biag iti tao? Dakkel ti akemna seknan ti panakaispal ti biag kas koma ti insidente iti atake iti puso, panakaalaw iti panakalmes, wenno ania man a panagpalliar ti panaganges ken pulso iti puso.

Segun kadagiti taga-Philippine Heart Association, isaysayangkatda ti programa a CPR on Wheels & Wings kadagiti nadumaduma a paset iti pagilian tapno maiyadalda ti CPR. Dakkel a sakripisyo daytoy nga ipapaay dagiti dodoktores a kameng iti PHA.

Gagemda a maaddaan ti tunggal pamilya wenno pagtaengan ti maysa a miembro nga ammona ti ag-CPR inkaso nga adda mapagteng nga emergency iti luglugarda.

Segun kadagiti dodoktores, maipakat ti CPR iti maysa a biktima bayat a maur-uray ti tulong medikal tapno maitaray isuna idiay ospital. Nasken ti panakaipakat ti chest compression ken mouth-to-mouth resuscitation apaman a naatake iti biktima agsipud ta delikado no aglabas ti minutos.

Ita a lawas, nakadanon ti PHA’s CPR on Wheels & Wings ditoy Laoag kalpasan a naggapu idiay Vigan. Naruay nga umili ti nagsanay nga ag-CPR.

Maragsakanda ta nakaadal no kasano a makatulongda a mangsalbar ti biag iti pada a tao inkaso nga adda emergency.

Tiemponan a maadalan ti kaadduan nga umili iti panag-CPR. Ngamin, adun a kakailiantayo ti maat-atake ti puso ken maes-stroke gapu ti panaka-abuso ti salun-at kas iti sobra pannangan ti nataba, naapgad ken nasam-it, kaawan ti ehersisyo, panagsigarilyo, panaginom ti arak, panagdroga ken dadduma pay a klase iti bisyo.

Adun ti timmaud a beach ken river resorts ditoy luglugartayo. Kas resulta, agsasaruno ti insidente iti panakalmes. Numan pay adda dagiti insigida a maalaw, nalabit awan ti makaammo a mangipakat ti CPR iti biktima.

Adu ti masalbar nga agnga-ngabit a biag, no CPR-ready ti kadduan nga ordinaryo a kakailiantayo.#