PANAGBALLOG

Napaneknekan nga adda latta dagiti ubbing a nalaing wenno nairuam nga agballog bayat ti tiempo ti panagkaklase iti pagadalan. Kas iti napasamak idiay Solsona, Ilocos Norte a nakatilliwan ti uppat edad 15 ken 16 nga estudiante nga agi-inom ti arak iti sirok ti rangtay iti nasao nga ili, oras nga addada koma idiay uneg iti classroom, segun ti panagsarita ni Hepe iti polisia, Chief Inspector Rodelio Santos idi Mierkoles, Hunyo 5.

Nakemmeg dagiti uppat a suspetsa gapu ti panagsalungasing ti Ilocos Norte Anti-Truancy Ordinance (INATO) No. 005-2010 for Elementary Pupils and High School Students a maiparit kadagiti estudiantes ken pupils ti agwarangwarang kadagiti lugar a pampubliko ken negosyo establismento no tiempo ti panagkaklase iti eskuelaan. Addan nasional Anti-Truancy Law nga inaprobaran idin daydi presidente Ferdinand Marcos ken inamendaran ti Kongreso idi panawen ni presidente Gloria Arroyo.

Di bumorong nga adu pay nga estudiantes ken pupils kadagiti sabsabali a pagadalan ditoy Ilocos Norte ti nalaing wenno nairuam nga agballog bayat ti makunkuna nga “school hours”. Kasla da met kasiguruan nga agpakada kadagiti nagannak kadakuada a mapan agbasa ngem haan metten ta sabalin ti pagturonganda wenno ag-”cutting classes” da.

Iti kastoy a situasyon, rumbeng a naridam dagiti nagannak ken mangisursuro, partikular ti “classroom teacher”. No masansanen nga agliwat ti estudiante, segurado nga adda dakkel a problema ti ubing. Kasapulan ti naan-anay a pannarabay ken guidance counselling iti kasapaan a gundaway sakbay a maiwawa ti dana iti ubing ken mailiklik isuna nga agbalinto a rituer iti kagimongan.#

 

Date of newspaper issue: July 3-9, 2017