Sekretaryo Roy

Editorial Logo

Ipannakeltayo a taga-Ilocos ti pannakadutok ni Gen. Roy Cimatu, retirado nga AFP Chief of Staff, a kas kabarbaro a Sekretaryo iti DENR (Department of Environment and National Resources). Tubo isuna ti Bangui, Ilocos Norte ken kabsat ni agdama a Mayor Fidel Cimatu Jr. iti nasao met laeng nga ili.

Ni General Cimatu ti maikaddua a pada nga Ilocano a kameng iti Kabinete ni Pangulo DU30. Immuna a natudokan ni Gen. Ricardo Visaya, retirado a AFP Chief of Staff, a kas Hepe iti National Irrigation Administration. Taga-Bacarra, Ilocos Norte ni apo Visaya.

cimatu swearing

Dakkel ti panagtalek ni Presidente Duterte ti kabaelan ni apo Roy gapu ti nabaknang nga eksperyansana iti pannakaiwanwan ti sangay iti gobyerno. Kas dati a Chief of Staff ti sibubukel nga Armada iti Pilipinas ken nagbalin pay nga Ambassador idiay Middle East, tumutop la unay nga isu ti mangimaton ti DENR tapno itultuloyna ti panagserbi iti pagilian nangnangruna ti panakatagiben ti aglawlaw gapu ti pangta iti makunkuna a Climate Change.

Dakkel ti giddiatda ken ni Gina Lopez, ti sinukatanna a DENR secretary nga inwalin ti Commission on Appointment gapu ti adu a rason. Darukadok ngamin no agdesisyon ni Lopez kadagiti polisiyana. Paglainganna ti agbangawngaw iti media. Natantanang ken kalkulado ti garaw ni apo Roy maibasar ti gapuanan a kas dati a militar ken ambassador.
Dayta a talugading ni apo Roy ti manamnama nga ipakatna iti Departmento nga intalek kenkuana ni President Duterte. Para ti pannakasaluad ti Ina a Daga (Mother Earth), ikararagtayo koma ti panagballigi ti amin a gannuat ni Sekretaryo Roy bayat ti panangtimonna ti DENR.#